Wednesday, September 7, 2016

ပြန်ကြားရေးဝန်ကြီးဌာန၏ ပြည်သူ့အတွက် ပထမ ရက် (၁၀၀)အတွင်း ဘာတွေလုပ်ဆောင်မှာလဲ


ပြန်ကြားရေးဝန်ကြီးဌာနအနေဖြင့် ပြည်သူနှင့်အစိုးရကြားပေါင်းကူးဆက်သွယ်ပေးမည့် ပြုပြင် ပြောင်းလဲမှုများကို
ပြည်သူ့အတွက် ရက်တစ်ရာစီမံချက်အဖြစ် ဆောင်ရွက်သွားမည် ဖြစ်သည်။

သတင်းမီဒီယာများဖွံ့ဖြိုးတိုးတက်ရေး၊ စာပေဖွံ့ဖြိုးတိုးတက်ရန်ရေး၊ စာအုပ်စာပေ ဖွံ့ဖြိုးတိုးတက်ရေး တို့ကိုဆောင်ရွက် လျက်ရှိပြီးသတင်းရရှိမှုနှင့် ပတ်သက်၍ နိုင်ငံအတွင်းရှိသည့်သတင်းမီဒီယာ အဖွဲ့အစည်းများ၊ သတင်းမီဒီယာလွတ်လပ်ခွင့်နှင့်ပတ်သက်၍ စိတ်ဝင်စားသည့် တစ်ဦးချင်းသော ပုဂ္ဂိုလ်များ အသင်းအဖွဲ့များကို ဖိတ်ကြားဆွေးနွေးကာညှိနှိုင်းဆောင်ရွက်သွားမည်ဖြစ်သည်။

ဝန်ကြီးဌာနအသီးသီးမှ ပြောရေးဆိုခွင့်ရှိသည့် ပုဂ္ဂိုလ်များကိုဖိတ်ကြားပြီးပြောရေးဆိုခွင့်ရှိသူ၏ လုပ်ငန်း တာဝန်များအောင်အောင်မြင်မြင် ဆောင်ရွက်နိုင်ရန် မည်သို့ဆောင်ရွက်မည်ဆိုသည့် ဆွေးနွေး ညှိနှိုင်းပွဲ ကိုလည်း မကြာသေးမီက ပြုလုပ်ခဲ့ပြီး ဖြစ်သည်။

ရန်ကုန်မြို့လယ် စာပေဗိမာန်အဆောက်အဦး၏ မြေညီထပ်ရှိစာအုပ်ဆိုင်ကိုလည်းကျယ်ဝန်းသည့် စာအုပ် ဆိုင် တစ်ဆိုင်ဖြစ်လာစေရေး ပြုပြင်ပြောင်းလဲရန် ညှိနှိုင်းဆောင်ရွက်လျက် ရှိသည်။

ပြန်ကြားရေးဝန်ကြီးဌာန၏ ပြည်သူ့အတွက် ပထမရက် ၁၀၀ အတွင်းလုပ်ဆောင်ချက်တွင် အပိုင်း နှစ်ပိုင်းရှိပြီးပထမအပိုင်းအနေဖြင့် သတင်းအချက် အလက်ရယူခွင့် (Access to Information)နှင့် ပတ်သက်၍ မီဒီယာများနှင့် အများပြည်သူသိလိုသည့်သတင်းအချက်အလက်များ မီဒီယာများ ရရှိစေရေးဆောင်ရွက်သွားမည်ဖြစ်သည်။

မြန်မာ့အသံနှင့်ရုပ်မြင်သံကြားအနေဖြင့် အစိုးရ၏မူဝါဒများ၊ အစိုးရမှ ပြည်သူ အတွက် ဆောင်ရွက်ပေး နေမှု များကိုဖော်ပြပေးနေသည့်အပြင်ပြည်သူများ၏ အသံ၊ပြည်သူများ၏ လိုအပ်ချက်၊ပြည်သူများမှ အစိုးရကို တင်ပြလိုသည့် သတင်းစကားများကို လည်းပြည်သူ့ကိုယ်စား ထုတ်လွှင့်ပေးနိုင်ရေးကိုလည်းဆောင်ရွက်ပေး သွားမည်ဖြစ်သည်။

ပုံနှိပ်ရေးနှင့်ထုတ်ဝေရေးဦးစီးဌာနအနေဖြင့်ပထမရက်(၁ဝဝ)အတွင်းဆောင်ရွက်မည့်လုပ်ငန်းများကိုအကောင်အထည်ဖော်ရာတွင် စာပေဌာနခွဲ(စာပေဗိမာန်)မှ ဆောင်ရွက်နေသည့်စာပေဖွံ့ဖြိုး တိုးတက်ရေး ကဏ္ဍနှင့်ပုံနှိပ်စက်ရုံများ၏ ပုံနှိပ်ထုတ်လုပ်ခြင်းလုပ်ငန်း ကဏ္ဍဆိုသည့်ကဏ္ဍ(၂)ရပ် ကိုအကောင်အထည်ဖော်ဆောင်ရွက် သွားမည်ဖြစ်သည်။

စာပေဗိမာန်ကဆောင်ရွက်နေသည့်အခန်းကဏ္ဍတွင်လက်ရှိဆောင်ရွက်နေသည့်အမျိုးသားစာပေဆု နှင့် စာပေဗိမာန်စာမူဆုများစိစစ်ရွေးချယ်ရာတွင်စိစစ်ရွေးချယ်ရေးအဖွဲ့များတွင်စာပေနယ်မှထင်ရှား ကျော်ကြားသည့်စာပေပညာရှင်များပိုမိုပူးပေါင်းပါဝင်လာစေရေးစီမံဆောင်ရွက်လျက်ရှိပြီး စာပေဆုများစိစစ်ရွေးချယ်ရာတွင်ပိုမိုပွင့်လင်းမြင်သာမှုရှိစွာဆောင်ရွက်သွားမည်ဖြစ်သည်။

မြန်မာစာပေဖွံ့ဖြိုးတိုးတက်ရေးလုပ်ငန်းစဉ်များဖြစ်သည့် စာတမ်းဖတ်ပွဲ၊ စာအုပ်ဈေးပွဲတော်၊ စာပေ ဆိုင်ရာ အလုပ်ရုံဆွေးနွေးပွဲစသည့်လှုပ်ရှားမှုများနှင့် အခမ်းအနားများတွင် ပြည်သူများပိုမို တက်ကြွစွာ ပါဝင်ရေးဆောင်ရွက် သွားမည့်အပြင်စာပေလုပ်ငန်းဖွံ့ဖြိုးတိုးတက်စေရေး မိတ်ဖက်စာပေ အဖွဲ့အစည်း များနှင့် လည်းပေါင်းစပ်ညှိနှိုင်းဆောင်ရွက် သွားမည် ဖြစ်သည်။

ပြန်ကြားရေးနှင့်ပြည်သူ့ဆက်ဆံရေးဦးစီးဌာန အနေဖြင့် ရက်ပေါင်းတစ်ရာအတွင်း အဓိကဆောင်ရွက် မည့်လုပ်ငန်း နှစ်ခုရှိပြီးပထမလုပ်ငန်းအနေဖြင် ရုံးများ၏ စာကြည့်တိုက်များကို ၀န်ဆောင်မှု အဆင့်မြှင့်တင်သည့်အနေဖြင့် Innovative Service များကိုဆောင်ရွက်သွားမည်ဖြစ်သည်။ ကော့မှူးမြို့နယ် တွင် ဒေါ်ခင်ကြည်ဖောင်ဒေးရှင်းနှင့် ပူးပေါင်းကာ Community Library အဖြစ်ဆောင်ရွက်ခဲ့ပြီး Community Centre အဖြစ်တိုးမြှင့် ဆောင်ရွက်သွားမည်ဖြစ်သည်။

လက်ရှိဆောင်ရွက်ခဲ့သည့် ကော့မှူးမြို့နယ်မှအောင်မြင်မှုများကို နမူနာရယူပြီးနတ်မောက်၊ ကလော၊ မြောင်းမြ၊ နေပြည်တော် လေးမြို့ကိုရက်တစ်ရာ အတွင်းအဆင့်မြှင့်တင်ဆောင်ရွက် သွားမည်ဖြစ် သည်။

ရန်ကုန်တွင် ငါးနေရာ၊ မန္တလေးတွင် သုံးနေရာ Community Centre အဖြစ် ရွေးချယ်ပြီးဆောင်ရွက်သွားမည်ဖြစ်သည်။

ပြန်ကြားရေးဝန်ကြီးဌာနအနေဖြင့် ပြည်သူကိုမျက်နှာမူပြီး ပြည်သူနှင့် အစိုးရကြားပေါင်းကူး တံတား အဖြစ် ဆက်သွယ်ဆောင်ရွက်ပေးနိုင်ရန်အတွက် ပြင်ဆင်ဖြည့်စွက်ရန်ရှိသည့် ဥပဒေများကို ပြင်ဆင်ဖြည့်စွက်ခြင်း၊ လိုအပ်သည့် ဥပဒေများရေးဆွဲပြဋ္ဌာန်းခြင်း၊ ပုံနှိပ်မီဒီယာနှင့် ရုပ်သံမီဒီယာ များဖွံ့ဖြိုးရေး၊ စာနယ်ဇင်းလောက ဖွံ့ဖြိုးရေးအတွက် ပြည်တွင်း ပြည်ပစာပေ ပညာရှင် များနှင့် ပူးပေါင်း၍ စာပေဆွေးနွေးပွဲများကျင်းပခြင်း၊ ယခင်စာကြည့်တိုက် ဟောင်းများကို Community Library၊ Community Centre များအဖြစ် အဆင့်မြှင့်တင်ခြင်း တို့ကို ရက်တစ်ရာ စီမံချက်ဖြင့် ပြုပြင်ပြောင်းလဲအကောင်အထည်ဖော်ဆောင်ရွက်သွားမည် ဖြစ်သည်။




No comments:

Post a Comment